மரணத்தைக் கண்டு பயப்படுவது மனித இயல்பு. ஆனால், அதே மரணத்தின் அடையாளங்களை ஆன்மீகத்தின் உச்சக்கட்டப் படிக்கட்டாகப் பயன்படுத்தும் வினோதச் சடங்குகள் உலகெங்கும் இன்றும் நீடிக்கின்றன.
அண்மையில் சமூக வலைத்தளங்களில் வைரலான ஒரு வீடியோவில், நன்கு படித்த தோற்றம் கொண்ட நபர் ஒருவர், ஒரு கிறிஸ்தவ மடாலயப் பின்னணியில் மனித மண்டை ஓட்டைத் தன் தலையில் வைத்துப் பிரார்த்தனை செய்யும் காட்சி பலரையும் ஆச்சரியத்தில் ஆழ்த்தியது.
மேலோட்டமாகப் பார்க்கும்போது இது ஒரு காட்டுமிராண்டித்தனமான அல்லது பயமுறுத்தும் சடங்காகத் தோன்றலாம். ஆனால், இதன் பின்னணியில் உள்ள தத்துவத்தை ஆராய்ந்தால், அது நம் இந்தியாவின் 'சைவ திருநீறு மரபோடு' (Saivism - Holy Ash) ஆச்சரியமளிக்கும் வகையில் ஒத்துப் போவதைக் காண முடிகிறது.
கத்தோலிக்க மற்றும் ஆர்த்தடாக்ஸ் கிறிஸ்தவ மடாலயங்களின் ரகசிய சடங்கு:
ஐரோப்பிய நாடுகள், கிரேக்கம் மற்றும் உருமேனியாவில் உள்ள சில பழமையான கிறிஸ்தவ மடாலயங்களில் (Monasteries) ஒரு விசித்திரமான வழக்கம் இன்றும் கடைப்பிடிக்கப்படுகிறது. அங்கு வாழ்ந்து மறைந்த துறவிகளின் உடல்கள் புதைக்கப்பட்டு, சில ஆண்டுகளுக்குப் பிறகு மீண்டும் தோண்டி எடுக்கப்படுகின்றன.
அவற்றிலிருந்து எடுக்கப்படும் மண்டை ஓடுகளில் அந்த துறவியின் பெயர், அவர் செய்த ஆன்மீகப் பணிகள் எழுதப்பட்டு, மடாலயத்தின் ரகசிய எலும்பு காப்பகங்களில் (Ossuaries) பாதுகாப்பாக வைக்கப்படுகின்றன. புதிய துறவிகள் தீட்சை பெறும்போதோ அல்லது தியானத்தின் உச்ச நிலையிலோ, இந்த மூத்த துறவிகளின் மண்டை ஓடுகளைத் தங்கள் தலையில் வைத்துப் பிரார்த்தனை செய்கிறார்கள்.
இதற்கு அவர்கள் வைத்துள்ள பெயர் 'மெமெண்டோ மோரி' (Memento Mori).
அதாவது, "நீ ஒருநாள் இறக்கப் போகிறாய் என்பதை நினைவில் கொள்!" என்பது இதன் அர்த்தம். நாம் எவ்வளவு பெரிய அறிவாளியாக இருந்தாலும், ஆன்மீகப் பாதையில் உயர்ந்திருந்தாலும் ஒரு நாள் இந்த உடம்பு வெறும் மண்டை ஓடாகத்தான் மாறப்போகிறது என்ற பேருண்மையை உணர்ந்து, அகந்தையை ஒழிக்க இந்த சடங்கு நடத்தப்படுகிறது.
இந்திய சைவ திருநீற்று முறையும்.. பிரபஞ்ச தத்துவமும்..!
இப்போது நம் மண்ணின் பாரம்பரியத்திற்கு வருவோம். இந்து மதத்தில், குறிப்பாக சைவ மரபில் நாம் தினமும் நெற்றியில் இட்டுக்கொள்ளும் திருநீறு (விபூதி / பஸ்மம்) வெறும் ஆன்மீக அடையாளம் மட்டுமல்ல; அதுவும் ஒரு 'மெமெண்டோ மோரி' தான்!
திருநீறு என்பது எரிக்கப்பட்ட சாம்பல். "நீ எவ்வளவு பெரிய பணக்காரனாக இருந்தாலும், அழகனாக இருந்தாலும், படித்தவனாக இருந்தாலும், ஒரு நாள் இந்த உடல் எரிந்து சாம்பலாகத்தான் போகிறது" என்பதைத் திருநீறு நமக்கு ஒவ்வொரு நொடியும் நினைவூட்டுகிறது.
சிவபெருமான் சுடுகாட்டுச் சாம்பலைத் தன் உடல் முழுவதும் பூசியிருப்பதும், கையில் மனித மண்டை ஓட்டை (கபாலம்) ஏந்தியிருப்பதும் (காபாலிக மரபு) இதையே உணர்த்துகிறது.
மரணம் என்பது பயப்பட வேண்டிய ஒன்றல்ல; அது வாழ்க்கையின் தவிர்க்க முடியாத இறுதிப் புள்ளி என்பதை உணரும்போது மனிதனுக்குள் இருக்கும் 'அகந்தை' (Ego) அடியோடு அழிகிறது.
உலகை இணைக்கும் ஒரே தத்துவம்: 'அகந்தை அழிப்பு':
கலாச்சாரங்கள் மாறலாம், வழிபாட்டு முறைகள் மாறலாம், ஆனால் மனித மன பக்குவத்திற்கான தத்துவம் உலகெங்கும் ஒன்றுதான் என்பதற்கு இந்த இரு வேறு சடங்குகளே சாட்சி!
ஆக, பழங்குடி மக்களின் அறியாமை சடங்கு என்று நாம் நினைக்கும் பல விஷயங்களுக்குப் பின்னால், படித்த மேலைநாட்டுத் துறவிகளும், நம் நாட்டுச் சித்தர்களும் ஒரே மாதிரியான ஞானத்தையே தேடியிருக்கிறார்கள்.
உடை, மொழி, மதம் தாண்டி மனித உடலின் நிலையற்ற தன்மையையும், ஆன்மாவின் நிரந்தரத் தன்மையையும் உணர்த்துவதே உலகெங்கும் காணப்படும் இந்த வினோத மண்டை ஓடு வழிபாடுகளின் உண்மையான பொருள்!
-Yozen Balki 💢
கருத்துகள் இல்லை:
கருத்துரையிடுக
You can give here your comments: